【大阪紅葉地圖】5大鐵路沿線大阪賞楓景點!1小時車程內到達!(2019年更新版)

關西地區嘅紅葉就預計由11月上旬開始至到12月上旬,最佳紅葉觀賞期為12月上旬,淨係大阪市內同週邊地區就已經有好多賞楓地點比大家選擇。小編都明白大家行程緊湊、亦唔想左轉右轉又鐵路又巴士咁,所以精選咗5個鐵路沿線嘅賞楓景點比大家,車程全部喺1小時之內(由梅田出發計算),各有特色,大家可以按自己嘅行程同興趣參考。

大阪週邊當然唔止5個賞楓地點,小編揀呢5個係比較過各個賞楓地點嘅特色之後,揀咗同類型當中交通比較方便嘅出嚟,介紹嘅次序亦係按車程由近至遠編排。所有交通安排都係以梅田做出發點,如果你唔係由梅田出發可以喺Facebook INBOX我地。

1 大阪城公園 森之宮站天守閣銀杏葉

  • 地址:〒540-0002 大阪市中央區大阪城
  • 車程:約15分鐘
  • 附近車站:JR大阪環狀線「森之宮站」
  • 建議交通:JR大阪環狀線「大阪站」→「森之宮站」(3-B出口步行入園)
  • 方便指數:★★★★★(5★最高)
  • 預計紅葉時間:11月上旬-12月中旬
  • 特色:古跡(大阪城天守閣)、銀杏葉
  • 費用:免費
  • 官方網頁

如果你行程緊湊、一家大細,咁去大阪城睇紅葉就最方便啦!大阪城公園喺大阪市市內,園內有櫻樹紅葉、黃爐紅葉(天守閣北側)、銀杏樹。除咗JR大阪環狀線,地鐵都有站,車程又短,仲可以一次過睇埋天守閣呢啲景點,預半日左右就已經可以行哂天守閣、影埋紅葉同銀杏,行程再緊都無問題!(延伸閱動:著住和服睇紅葉!大阪市內一日和服體驗)

2 萬博紀念公園 萬博紀念公園站紅葉之瀧高架空中步道

  • 地址:〒565-0826 大阪府吹田市千裏萬博公園
  • 車程:約40分鐘
  • 附近車站:大阪單軌電車「萬博紀念公園站」
  • 建議交通:
    • (1) 地鐵御堂筋線「梅田站」→「千里中央站」→ 大阪單軌電車「萬博紀念公園站」
    • (2) 阪急千里線「梅田站」→「山田站」→ 大阪單軌電車「萬博紀念公園站」
  • 方便指數:★★★★(5★最高)
  • 預計紅葉時間:11月中旬-12月上旬 (09:30-17:00)
  • 特色:日本庭園、自然景觀、高架空中步道
  • 費用:自然文化園・日本庭園門票(成人¥250、小中學生¥70)
  • 官方網頁

萬博紀念公園係1970年大阪舉辦「日本萬國博覽會」嘅「遺跡」,標誌性嘅太陽塔大家一定有印象,園區非常大,除咗用對腳行,園區亦有小火車載大家參觀(另外收費¥350/次,小火車時間表),幫大家慳返啲腳骨力!園內日本庭園、自然文化園內種有約20種、1萬棵樹,包括落羽杉、銀杏、三叉戟楓等多品種的紅葉,自然文化園入面有「紅葉之瀧」,和式庭園+自然景觀,係影相好地點!此外自然文化園入面仲有高架空中步道比大家由上而下觀賞景色!

3 大仙公園 百舌鳥站夜間紅葉演奏會

  • 地址:〒590-0801 堺市堺区大仙中町(大仙公園内)
  • 車程:約40分鐘
  • 附近車站:JR阪和線「百舌鳥站」
  • 建議交通:
    • (1) JR大阪環狀線「梅田站」→「堺市站」→ JR阪和線「百舌鳥站」
    • (2) 地鐵谷町線「梅田站」→「天王寺站」→ JR阪和線「百舌鳥站」
  • 方便指數:★★★(5★最高)
  • 預計紅葉時間:11月中旬-11月下旬
  • 夜間「紅葉の宴」:11月26日起開放
  • 特色:日本庭園、自然景觀、夜間紅葉
  • 費用:免費(**夜間特別開放「紅葉の宴」成人¥200、中小學生¥100)
  • 官方網頁

大仙公園位於大阪市以南堺市內,園內嘅大仙公園日本庭園喺紅葉觀賞期間會特別喺夜晚開放,日式庭園環境下喺燈光映襯下,展現出同白天截然不同嘅夢幻景觀,加上傍晚時分嘅演奏會,別有一番風味。

4 箕面公園 箕面站箕面瀑布大阪箕面公園紅葉祭

  • 地址:〒562-0002 大阪府箕面市箕面公園
  • 車程:約30分鐘
  • 附近車站:阪急箕面線「箕面站」
  • 建議交通:阪急寶塚線「梅田站」→「石橋站」→ 阪急箕面線「箕面站」(需步行上山,由箕面站到瀑布約2.8KM,約45分鐘)
  • 方便指數:★★★(5★最高)
  • 預計紅葉時間:11月中旬-12月上旬(大阪箕面公園紅葉祭 11月1日-11月30日)
  • 特色:日本寺廟、自然景觀(箕面瀑布)
  • 費用:免費
  • 官方網頁

箕面公園喺大阪市以北箕面市內,被指定為國家公園,園內栽種咗超過1000種植物,最出名嘅係高33M嘅箕面瀑布,係紅葉襯托下景色更加壯麗,攝影必到!另外提提大家,千萬不要錯過箕面公園的名產「炸楓葉」(もみじの天ぷら)!由箕面站行到箕面瀑布大概45分鐘,沿途會經過好多景點:西江寺、一の橋、昆蟲館、瀧安寺、野口英世像、唐人戾橋等等,唔覺唔覺就到架啦!路就一啲唔難行,但始終係上山嘅路記住著舒適嘅衫同鞋丫!

5 星田園地(ほしだ園地) 私市站大阪府民の森星のブランコ

  • 地址:大阪府交野市大字星田地内
  • 車程:約50分鐘
  • 附近車站:京阪交野線「私市站」
  • 建議交通:JR片町線「北新地站」→「河内磐船站」→ 京阪交野線「河內森站」→「私市站」(需步行上山,由私市站到吊橋約2.5KM,約40分鐘)
  • 方便指數:★★★(5★最高)
  • 預計紅葉時間:11月中旬-12月上旬 (開放時間:09:30-16:30)
  • 特色:自然景觀、高空吊橋360度賞楓
  • 費用:免費
  • 官方網頁

星田園地位於大阪以東交野市內,小編掙扎咗好耐先決定介紹星田園地,因為雖然佢附近有私市站,但係佢全程都係行緊山!不過因為一條橋,小編都係決定要介紹比大家!星田園地係「大阪府民の森」有日本最大嘅吊橋「星のブランコ」,長280M高50M,感受被紅葉360度包圍。(最後要同大家打定個底先,星田園地就類似我地嘅郊野公園,園內亦無餐飲設施,所以去之前記住要準備糧水同穿著合適嘅衫同鞋!)